فراشة وجراد☘️

في يوم من الأيام في سالف العصر والزمان، في بستان في حديقة الحيوان، الشمس كانت طالعة والورد كان زاهي ومنور تحت الشمس. فراشتنا الجميلة قامت الصبح عاوزة تخرج تجيب أكل. اتفقت مع صاحبتها إنهم يروحوا بستان الورد ويجيبوا رحيق من الوردة البيضاء. فراشتنا الرقيقة كانت بتحب رحيق العسل، هي سمته كده علشان كان أبيض زي العسل. قالت لصاحبتها: "هسبقك على هناك"، صاحبتها قالت لها: "بس خلي بالك من الجراد الشرير". قالت: "حاضر".

راحت فراشتنا الرقيقة للبستان واستنتي صاحبتها. فجأة سمعت صوت تحت الورد بيقول لها: "ساعديني يا فراشة، ساعديني واديني من معاكي شوية رحيق من اللي اتحملتي بيهم". بصت فراشة وقالت: "مين عاوز مساعدة؟ أنا هنا، أنا هنا". لقيته الجراد على الأرض بيقول لها: "رجلي اتكسرت وأنا بجمع رحيق". قالت: "يا عيني، غلبان ومسكين، هديك شوية اللي لمّيتهم قبل ما صاحبتي تيجي، وبعدين ألمه معاها تاني. اليوم لسه طويل، أعمل خير يمكن ألاقي خير".

نزلت عشان تدي له الرحيق، بس هو ما اكتفاش إنه كدب عليها إن رجله مكسورة، لا، ده شد منها الرحيق كله وكسر لها جناحها... الشرير الوحش.

أخذ الرحيق وهرب بيه على جحره وسابها يا عيني بتعيط.

جت صاحبة فراشتنا الجميلة وقعدت تدور عليها وتقول: "يا ترى حصل لها حاجة مش كويسة؟ يا صاحبتي الجميلة، أنتي فين؟ أنتي فين يا صاحبتي...؟ محدش بيرد، ليه يا صاحبتي؟"

فجأة سمعت صوت أنين وعياط جاي من تحت الوردات، واتفاجئت إنه صاحبتها. جريت عليها وسألتها على اللي حصل، فراشة حكيت لها كل حاجة وقالت لها على الجراد الوحش.

صاحبتها قالت لها إنها لازم هتنتقم منه، وقالت لها إنها تتعلم ما تساعدش أي حد وما تثقش في كلام الناس الوحشين، وتسمع لنصايح غيرها.

فراشة عيطت واتأسفت لصاحبتها، وقالت لها إنها مش هتعمل كده تاني، وهتسمع نصيحتها.

صاحبتها حضنتها وقالت لها: "مش زعلانة منك، بس ابقي اسمعي كلامي بعد كده، وتعالي نشوف هنعمل إيه ونجيب حقك إزاي".

فراشة وصاحبتها راحوا لقبيلة النمل، راحوا لشيخ النمل. شيخ النمل قال لهم إنه هيكلم ملك الجراد العادل.

شيخ النمل كلم ملك الجراد وقال له على اللي الجراد عمله في الفراشة الطيبة.

ملك الجراد أخذ الرحيق وأعطاه للفراشة، وكافأها بزهريّة ورد جميلة، وحبس الجراد في السجن عشان يتأدب ويتربى.

وتوتة توتة، خلصت الحدوتة... حلوة ولا ملتوته؟ استنوني في حكاية جديدة وقصة جديدة. 

مكتوبة بكل حب اهم حاجه نستفاد منها إننا منساعدش أي حد ومنثقش في الناس ومش كل الناس اللي ينفع نديهم حاجتنا ونسمع النصايح ونديها اهمية كبيرة🩷

كتب بيد هدى حسين 💖