ليه بنختار الناس غلط؟

ليه بنختار دايما اشخاص غلط و ليه كل مرة بنفتكر إنها الأخيرة؟

الموضوع مش بس في العلاقات..

إحنا ممكن نختار الناس الغلط كصحاب، كـ شركاء، كناس نديهم أسرارنا، ضهرنا، أو حتى وقتنا.

فيه لحظة معينة، بنفتكر إن الشخص ده هو "الأمان"،

بنصدق كلامه، ونستقبل حضنه كأنه وطن.

بس ياما حضون كانت باردة، وياما وطن كان فخ.

ليه بنختارهم؟

علشان إحنا في لحظة ضعف، محتاجين حد يطبطب.

بنلاقي أول شخص "يظهر اهتمام"،

فنقع في فخ التعلق مش الحب.

نتعلق بفكرة إننا مش لوحدنا،

إن حد شايفنا، سامعنا، بيهتم – حتى لو ده كله "مؤقت".

إحنا مش ضعاف..

إحنا بس بشر، وقلوبنا أوقات بتعوز تتشاف، تتسمع، تتحب.

بس المشكلة إننا بندي من نفسنا كتير،

نضحي، ونتغاضى، ونتوجع ونسكت.

نستنى منهم نفس النقاء اللي جوانا،

بس نكتشف إنهم كانوا بياخدوا مننا، مش بيضيفوا لينا.

وبنفضل نسأل:

"ليه أنا؟ وليه دايمًا بختار الغلط؟"

والإجابة؟

لأننا مش بنتعلم من الوجع،

بنعالجه بالهروب لشخص تاني..

فنقع في غلطة جديدة.

لكن الحقيقة اللي هتفوقك:

إنتِ مش غلطانة إنك حبّيتي.

إنتِ غلطانة إنك ماحبّتيش نفسك كفاية.

الناس الغلط دول جُمل في كتاب حياتك، مش الفصول كلها.

مواقف، دروس، حكايات لازم تتقفل صفحتها.

علشان لما ييجي الصح، تبقي عارفة قيمتك، مش مستنياله يقولك.

متخليش حد يقولك "انتي السبب"،

متسمعيش للي يقول "أصل طيبتك هي اللي ضيعتك".

اللي ضيّعك هو اختيار ماكانش ناضج،

لكن النضج بييجي من التكرار.. ومن القلب اللي بيتكسّر ويقوم.

انتي أقوى من كل مرة اتخذلتي فيها،

وأجمل من كل اللي ماقدروش يشوفوا جمالك.

والمرة الجاية؟

مش هتختاري الغلط،

لأنك هتكوني عرفتي قيمة نفسك الأول.

By Huda Hussein ☘️